20 ноябрь куни Curiosity Maker Space доирасида, Кремний водийсидан ташриф буюрган қуёш энергетикаси бўйича мутахассис Синтия Лэнг иштирокида Тошкентдаги “Физика-Қуёш”институтига танишув экскурсияси уюштирилди.
Болаларга институт бўйлаб экскурсия ташкил қилинди, ишлаб турган қуёш панеллари ва қуёш энергиясида ишлайдиган сув иситгичлар кўрсатилди. Биз Халқаро Қуёш Энергияси Институтининг томига чиқдик ҳамда қуёш энергиясида ишлайдиган ва марказий энергия тармоғига боғлиқ бўлмаган тўлиқ автоном уйни томоша қилдик.
Амалий намойишдан кейин Синтия болалар билан қуёш электр станцияларини лойиҳалаштириш бўйича ўз тажрибаси билан ўртоқлашди (масалан, у Калифорнияда 550 МВатт гача қувват ишлаб чиқарадиган қуёш электр станциясини лойиҳалаштириш ишларида қатнашган). Қизиқарли материал ва болаларнинг қизиқиши туфайли вақтнинг катта қисмини қуёш панелларининг ишлаш принциплари, уларнинг самарадорлиги, Ўзбекистонда қуёш панеллари билан боғлиқ кўп сонли лойиҳалар нега йўқлиги сабаблари эгаллади. Биз болаларни қуёш энергетикасига қизиқтириш ва уларни Maker Space тадбирларида яна қатнашиш учун мотивациялашнинг уддасидан чиқдик деб ўйлаймиз!
Институт директори Нилуфар Раббанақуловна Авезовага тадбирни ташкил этишдаги кўмаги учун миннатдорчилик билдирамиз.
Curiosity Maker Space Ўзбекистон Инновацион Ривожланиш вазирлиги ва Ўзбекистондаги АҚШ элчихонаси томонидан қўллаб-қувватланмоқда.
